Орал қаласы әкімдігінің баспасөз қызметі хабарлағандай, кеше, 2026 жылғы 27 шілдеде күннің аптап ысуынан Зачаганск кентінен 15 шақырым жерде орналасқан қатты тұрмыстық қалдықтар (ҚТҚ) полигонында өрт шықты. Жалын 12 гектар аумақты шарпыған.

«Түн бойы оқиға орнында ТЖД мен жергілікті атқарушы органдардың 67 маманы және 36 техникасы жұмыс істеді.

Өрт ошақтарына үздіксіз су құйылып, сөндірілген учаскелер топырақпен көмілуде.

Тілсіз жауды ауыздықтау жұмыстары әлі де жалғасуда, бүгін тағы 49 техника жұмылдырылды. Жағдай бақылауда», — деп мәлімдеді Орал қаласының әкімдігінен.

Билік өкілдері қала тұрғындарын сабыр сақтауға және тек ресми ақпарат көздеріне сенуге шақырады.