Жұмадан, 10 шілдеден бастап Орал қаласының бір бөлігінде полицейлер самокатпен патрульдеуге көшеді. Тәртіп сақшылары екі дөңгелекті көлікпен қаланың ескі орталығы мен жаңа алаңда қызмет атқарады.

Полиция департаментінің мәліметінше, бүгіннен, яғни 2026 жылдың 10 шілдесінен бастап Оралда полицейлердің мобильді патрульдері қызметке кіріседі. Олар арнайы жабдықталған самокаттармен жүреді. Әкімдік қалалық полиция басқармасына жалпы саны бес самокат бөлген. Тәртіп сақшылары бұл көліктермен демалыс паркінде, стелла маңындағы жағалауда, Тұңғыш Президент атындағы жаңа алаңда және Оралдың ескі орталығындағы көшелерде патрульдік қызмет атқарады.

— Бұл — пилоттық жоба. Әзірге бес самокат қана берілді, бұл, әрине, аз. Бірақ біз бұған дейін облысымызда қоғамдық тәртіпті күзетуде мұндай көлікті пайдаланбағанбыз. Сондықтан қазір осы бағытты байқап көргіміз келеді, — деді БҚО Полиция департаментінің бастығы Арман Оразалиев.

Оның атап өтуінше, облыс әкімі алдымен Оралдың адам көп жиналатын бөліктерін мобильді патрульмен қамтуды тапсырған. Бүгін Орал қаласы мен облыс әкімдері қалалық полицейлерге жаңа көліктердің кілтін салтанатты түрде табыс етті.

Мария Мельникова