Тамыз айында Стела маңындағы набережная ауданында біреу заңсыз қоршау қойып, ағаштарды кесіп тастады. Осы жерді мемлекетке қайтару үшін Орал билігі 1 жер телімін орталықтан және 2 жер телімін «Ақжайық» ықшамауданынан береді. Жалпы аумағы 2,1793 гектарды құрайтын бұл жер телімі 599 миллион 518 мың теңгеге бағаланып отыр.

«UMAROVNEWS» редакциясына мемлекеттік қажеттілік үшін жерді алмасу туралы келісімшарт келіп түсті. Құжатқа сәйкес, 2024 жылдың 4 тамызында қоғамдық дау туғызған ағаш кесу оқиғасынан кейін, бұл жер телімінің иесі анықталмай қалды. Бірақ 2024 жылдың 17 маусымында ол учаскенің сатылғаны, ал алты ай өткен соң, 2024 жылдың желтоқсанында, Орал қаласының жер қатынастары бөлімінің басшысы Мирас Мұхитов жаңа жер иесімен келісімшарт жасасқаны белгілі болды.

Билік үш жер телімін бермек:

Бірінші телім: Орал қаласының орталығында, Лермонтов пен Д. Нұрпейісова көшелері арасында орналасқан. Аумағы – 0,4119 га, бағасы – 248 миллион 869 мың теңге.

Екінші телім: «Ақжайық» ықшамауданында, аумағы – 0,3824 га, бағасы – 72 миллион 656 мың теңге.

Үшінші телім: сондай-ақ «Ақжайықта», аумағы – 1,4631 га, бағасы – 277 миллион 992 мың теңге. Жалпы құны – 599 миллион 518 мың теңге.

Жаңа иесімен байланысу мүмкін болды, ол бастапқыда барлық сұрақтарға жауап беруге уәде еткенімен, «Набережная ауданындағы жер телімін қаншаға және кімнен сатып алдыңыз?» деген жалғыз сұрақтан соң, сұхбат беруден бас тартты. Жер қатынастары бөлімінің басшысы Мирас Мұхитовпен де байланысу мүмкін болмады – ол екі рет қоңырауға жауап бермеді.

Еске сала кетейік, Стела маңындағы жер 2005 жылы мемлекет меншігінен шығарылған. Қазір сөз болып отырған 2,1793 гектарлық учаске сол кездегі жалпы ауданы 3,9 гектарды құрайтын үлкен жер телімінің бөлігі болған және 4 миллион 444 мың теңгеге жеке меншікке сатылған. Бұл сома бөліп төлеу арқылы өтелген.

Экологтар мен құқық қорғаушылар бұл жердің санитарлық-қорғау аймағы болуымен қатар, Жайық өзенінің су қорғау аймағына жататынын және ерекше шарттармен пайдаланылатын жер санатына кіретінін бірнеше рет мәлімдеген.

Талғат Омар