30 шілдеде, 20-ға жуық отбасының өкілдері «JAYIQ строй» ЖШС құрылыс компаниясының үстінен шағымдану үшін қалалық прокуратура ғимаратына жиналды. Жиналғандардың айтуынша, олар 2020 жылы Мөңкеұлы көшесі, 70А мекенжайындағы көпқабатты үйдің құрылысына үлескер ретінде ақша құйған. Алайда әлі күнге дейін зарыға күткен пәтерлеріне қол жеткізе алмай отыр. Оның үстіне, жұрт жақында ғана бұл шала біткен үйдің кейбір пәтерлерінің бірнеше қожайыны бар екенін білген — «JAYIQ строй» ЖШС бір тұрғын үй алаңына бірнеше үлескерден ақша тартқан болып шықты.

«Қазір үлескерлердің ортақ чатында 160 адам бар. Соның 50-ге жуығы өздерін алданғанбыз деп есептейді. Құрылыс салушы жұрттан ақша жинап алған, бірақ қазір анықталып жатқандай, біз бұл салынып жатқан үйден пәтер талап ете алмаймыз. Өйткені бұл пәтерлердің басқа иелері бар болып шықты», — дейді үлескерлердің бірі Гүләйна Ким.

Оның сөзіне қарағанда, Мөңкеұлы көшесі, 70А мекенжайындағы бес қабатты үйдің құрылысын «JAYIQ строй» ЖШС (директоры Исмаил Нұрғалиев) 2020 жылы бастаған. Кейіннен жоба өзгертіліп, үй 6 қабатты болып қайта жоспарланған. Бірақ құрылыс жұмыстары өте баяу жүрген.

Гүләйна Ким үлестік құрылысқа 10,5 миллион теңге құйған. Енді ол Исмаил Нұрғалиевтің ақшасын қайтарып бергенін қалайды.

Ал темірхан Батырғали есімді ақсақал «JAYIQ строй» ЖШС-нің үлескері қатарына 2023 жылы қосылған: ол үш бөлмелі пәтерді сатып алу туралы келісімшартқа отырып, құрылысқа пәтер құнының 50 пайызын — 7,4 миллион теңгені қолма-қол ақшалай берген. Қалған соманы үй пайдалануға берілгеннен кейін төлеуі тиіс болған. Алайда содан бері пәтер де берілмеген, ал ақшаны қайтару мәселесі әлі күнге дейін шешімін таппай тұр.

Орал қалалық прокуратурасының алдына жиналған үлескерлер құрылыс салушының «үйді өткіземіз» деген мәңгілік уәделерінен шаршағандарын жеткізді. Олардың бірі Индира Жарманова мердігердің кепілдік хатын көрсетті: онда үйдің 2026 жылдың 25 шілдесіне дейін пайдалануға берілетіні көрсетілген. Бірақ, тұрғындардың сөзіне сүйенсек, қазір нысанның терезесі де, есігі де жоқ, тек қаңқасы ғана қаңқиып тұр.

Журналистерді үлескерлермен бірге қалалық прокуратура ғимаратына кіргізбеді — прокурорлар кездесудің жабық форматта өтетінін түсіндірді. Кейін үлескерлердің өздері БАҚ өкілдеріне хабарлағандай, қадағалаушы орган оларға «JAYIQ строй» ЖШС-нің үстінен Зашаған полиция бөліміне арыз жазуға кеңес берген.

Біз «JAYIQ строй» ЖШС жетекшісі Исмаил Нұрғалиевтен түсініктеме алуға тырыстық. Алайда ол телефон қоңырауларына жауап бермей жатыр.

Людмила Калашникова