Қазіргі уақытта тергеу изоляторының (СИЗО) құрылысын аяқтап, оны мақсатты түрде пайдалану үшін жобалық-сметалық құжаттама әзірленіп жатыр.

1500 орынға арналған жаңа СИЗО құрылысы 2013 жылы басталған. Кейін бұл нысан қылмыстық тергеудің ортасында қалды: тергеу нұсқасына сәйкес, құрылыс барысында 1,5 млрд теңге жымқырылған. 2019 жылы «Алаяқтық» бабы бойынша мердігер компанияның иесі, ҚАЖК төрағасының орынбасары және мемлекеттік сараптама қызметкері сотталған.

Содан бері 5 млрд теңге жұмсалған ғимараттың тағдыры шешілмей тұрды. Оны бизнес нысандарына немесе ауруханаға бейімдеу ұсынылғанымен, бұл жоспарлар іске аспады. БҚО ҚАЖ департаментінде қазіргі уақытта құрылыс мәселесі әлі де шешілмеген күйде екенін хабарлады.

Алайда, Батыс Қазақстан облысы құрылыс басқармасының мәліметінше, құрылыс-монтаж жұмыстары шамамен 85 пайызға орындалған, қазіргі таңда жұмыс жобасын әзірлеу жүргізілуде. Техникалық тексеру өткізіліп, ақау актісі жасалды, жобалық-сметалық құжаттама қалыптастырылуда. «Аталған жұмыстар аяқталып, Мемлекеттік сараптаманың оң қорытындысы алынғаннан кейін құрылысты аяқтау және ғимаратты пайдалануға беру құнын нақты анықтау мүмкін болады», — деп хабарлады басқарма. Жобаны 2026 жылдың екінші тоқсанында аяқтау жоспарланып отыр.

Орал қаласында жаңа тергеу изоляторын салу мәселесі бірнеше жылдан бері көтеріліп келеді. Себебі СИЗО №74 1867 жылы салынған тарихи ғимаратта орналасқан және бүгінде апатты жағдайда тұр.
Өткен жылы онда тергеу-қамаудағылардың ең аз саны ғана ұсталатын болып шешілді, ал сотталғандар бұл изоляторға тек қысқа мерзімге — кейін түзету мекемелеріне кезең-кезеңімен жөнелту үшін ғана жеткізілген. Тергеудегі адамдардың негізгі бөлігі Орал қаласы мен облыс аудандарындағы уақытша ұстау изоляторларында орналастырылды.

Талғат Омар