2025 жылдың 1 қыркүйегінде Батыс Қазақстан облысында 379 мектептің есігі ашылады. Соның 86-сына күрделі жөндеу жүргізу қажет — бұл жалпы санның ширегіне жуық.
Өңірде сонымен қатар орын тапшылығы мәселесі де сақталып отыр: тоғыз мектепте балалар үш ауысымда оқиды. Оның төртеуі — Орал қаласында, бесеуі — ауылдарда орналасқан.

Дегенмен, 2025 жылы облыста жаңа білім нысандары да ашылды: Теректі ауданы Подстепное ауылында 1200 орындық мектеп және Орал қаласының «Балауса» шағын ауданында 1500 орындық №52 мектеп пайдалануға берілді. Бірақ мұндай мысалдар әзірге жалпы жағдайды өзгерте қойған жоқ.

БҚО-да әлі күнге дейін оқушылар даладағы әжетхананы пайдалануға мәжбүр мектептер бар. Екі мектеп те Теректі ауданында орналасқан — Шалқар және Алғабас ауылдарында.

Облыстық білім басқармасының мәліметінше, барлық 86 мектепті күрделі жөндеуден өткізу үшін 92,2 миллиард теңге қажет.

Талғат Омар