Жымпиты ауылындағы өртенген үйден қаза тапқандар – бір отбасының бес ұлы болып шықты. Ең үлкені 2019 жылдың 22 шілдесінде туған (биыл 6 жасқа толар еді), ал ең кішісі 2024 жылдың 29 қыркүйегінде туған (бір жасқа да толмаған).

Бұл – 2025 жылғы 4 маусым күні Сырым ауданының Жымпиты ауылында орын алған қайғылы оқиға. Жекеменшік үйде өрт шығып, үй жиһаздары мен тұрмыстық заттар жанған. Өрт болған кезде үй ішінде бес бала болған. Олардың барлығы ес-түссіз күйде көмірқышқыл газынан улану белгілерімен ауруханаға жеткізілді. Дәрігерлер бар күшін салғанымен, өкінішке қарай, бес баланың да өмірін аман алып қалу мүмкін болмады.

Өрт шыққан үйді бұл көп балалы отбасы жалдап тұрған. Қайғылы жағдайдан кейін Батыс Қазақстан облысының әкімі отбасыға баспана мәселесінде көмек көрсетілетінін хабарлады.

Талғат Омар