2 наурызда, Орал қаласындағы «Волна» бау-бақша қоғамының тұрғындары Президентке бейнеүндеу жазды. Бұл қоғам омега көпірінің маңында, қардың бейберекет төгілу аймағынан бар болғаны 100 метр қашықтықта орналасқан.

Тұрғындар мұнда қардың жинақталуына алаңдаулы. Олардың айтуынша, қарды бұл жерге 2024 жылдың 24 желтоқсанынан бастап тасымалдап жатыр, бірақ полигонды ұйымдастырушылардың қажетті құжаттары жоқ.

Дачалық қоғам тұрғындарының басты алаңдаушылығы – көктемгі тасқын қаупі. Қоғам төмен жерде орналасқандықтан, еріген қар суы жер телімдерін басып, құдықтар мен бұрғылау ұңғымаларын ластай алады. Ластанған қарда химиялық реагенттер бар болғандықтан, оның су мен топыраққа араласуы тұрғындар үшін үлкен қауіп төндіреді. Олардың су құбыры жүйесіне қосылу мүмкіндігі жоқ, сондықтан таза ауыз су мәселесі өте өзекті.

Орал қаласының тұрғын үй-коммуналдық шаруашылығы бөлімі облыстық мәслихаттың ережелеріне сүйене отырып, бұл орын қар ерігенге дейін уақытша белгіленгенін алға тартады. Алайда тұрғындар экология департаментінен бастап прокуратураға дейін түрлі мемлекеттік органдарға жүгінгенін және қарды тасымалдаушы ұйымның тиісті құжаттары жоқ екенін мәлімдейді.

Жергілікті халық қар тасымалын дереу тоқтатуды және жиналған қарды қауіпсіз жерге шығаруды талап етеді, өйткені бұл экологиялық апатқа алып келуі мүмкін.

Талғат Омар