Биыл су тасқыны басталғаннан кейін және 2024 жылдың қазан айына дейін Батыс Қазақстан облысының мамандандырылған ауданаралық әкімшілік сотына су тасқынынан зардап шеккен тұрғындардан әкімдік баспана беруден бас тартқан 312 талап-арыз түскен.
Батыс Қазақстан облысының облыстық сотының мәліметінше, жалпы талап арыздар санынан Батыс Қазақстан облысының мамандандырылған ауданаралық әкімшілік соты 237 талап арызды қараған. 194 қайтарылды, оның ішінде: 13 талап арыз – талапкердің сотқа дейінгі реттеу тәртібін сақтамауына байланысты, 1 – арызға негізсіз адам қол қойған, 175 – талап қоюшылардың өздері кері қайтарып алған, 4 – істер әкімшілік өндірісте қаралуға жатады, 1 – талап арыз беру мерзімі өтіп кеткен.
Небәрі екі талап арыз бойынша сот талапкерлердің талаптарын қанағаттандыру туралы 2 шешім (олар заңды күшіне енген жоқ) және талап қоюшылардың талаптарын қанағаттандырудан бас тарту туралы 29 қаулы (олар да заңды күшіне енген жоқ) шығарды.
Естеріңізге сала кетейік, Оралда су тасқынынан зардап шеккен 2300 отбасы баспаналы болды. Бұлар құжаттары реттелген адамдар. Олар үшін билік 400-ден астам үй салды, 600-ден астам жаңа пәтер сатып алды және қайталама нарықта 1000-нан астам пәтер сатып алды.
Талғат Омар